Avannaa Arctic Games Ilulissat 2025
Ukioq 2025-mi siullermeerluni Ilulissat timersortarfiani ingerlanneqassaaq – ingerlanneqaqqaarnerani nunat peqataasussat tassaapput Alaska, Nunavik, Nunavut aamma Kalaallit Nunarput.
Avannaa Arctic Games siullermeerluni Ilulissani februar arfineq-pingajuanniit 13-at ilanngullugu ingerlanneqassaaq.
Avannaa Arctic Games tassaavoq inuit issittormiut naggueqatigiit inersimasut inuusuttuaqqallu unammiuaarnerat, ukioq allorlugu ingerlanneqartartussaq
Inuit pinnguaataat aamma Dene pinnguaataat unammissutigineqartussat, iligiiaat ukioqatigiiaannut agguarsimasuni, 13-it ingerlanneqassapput. Periutsit pillugit Arctic Sport Greenland-ip nassuiaataa uani atuaruk.
Takorluukkat
Avannaata Kommuniata siunertaraa Avannaani naggueqatigullu timersorneq piorsarsimassuserpullu qitiutillugu ilisareqatigiilluni naapeqatigiittarnissaq. Avannaa Arctic Games takorluugaavoq Avannaata Kommuniani Ilulissani ukioq allorlugu ingerlanneqartassasoq.
Anguniakkat
Avannaa Arctic Games anguniangarivaa nunani avannarlerni naggueqatitsinnik ilisareqateqarsinnaaneq, kammalaatigiinneq timersortartorpalaarnerlu aqqutigalugit, nunatsinni timersuutit kulturitsinnut attuumassuteqartut inerisassallugit.
Pilersaarutit
Ukioq 2025-mi ingerlanneqaqqaarnerani nunat allat pingasut qaaqquneqarsimapput tassaasut Alaska, Nunavik, Nunavut. Nunarput aamma Arctic Sports Greenland suleqatigalugu peqataatitaqassaaq.
Ukioq siulleq ingerlanneqaqqaarnerani nunat tamarmik 23-nik peqataatitaqassapput taakkunani timersorlutik unammisussat 16-iussallutik.
Piorsarsimassutsikkut aaqqissuussat
Timersorluni unammiuaarnerup ingerlasussap saniatigut kulturikkut aaqqissuussani qulequtarineqassaaq
OQALUTTUAQATTAANNEQ/STORYTELLING;
Qulequtarineqartumik pingaartinneqarsimavoq naggueqatigiiulluta, ulluinnarni naliginnaasumik attaveqaatit aqqutillu imaanginnanngikkaluartut, Inuit naggueqatigiilluta oqaluttuaatigut qanoq qanitsiginersut takutinneqassasoq. Kulturikkut aaqqissuussat ataqatigiissarneqarput Kulturhus Sermermiut suleqatigalugu.
Avannaata Kommuniata Arctic Sport Greenland suleqatigalugu saqqummiuppaat, unammersuarneq ingerlanneqartussaq februarip 9-anit 13-at ilanngullugu. Unammersuarneq illup iluani pisussat Timersortarfimmi ingerlanneqassapput, silamilu unammersuarnerit timersortarfiup akiani arsaattarfitoqqami ingerlanneqassallutik.
