Avannaa Arctic Games Ilulissani ingerlanneqassaaq, aaqqissuussinerlu Avannaata Kommuniata aamma Arctic Sports Greenland-ip suleqatigiinneratigut ingerlanneqassaaq.
Unammiuaartitsineq Alaskamit, Nunavimmit, Nunavumit Kalaallit Nunaanniillu peqataaffigineqassaaq, nunat pineqartut tamarmik 23-nik peqataatitaqassallutik. Taakku ilaat timersortartuussapput ilaallu kulturikkut suliaqartussatut peqataassallutik.
”Neriuutigivara peqataasut imminnut ataqqeqatigiinnissaat taamaalillutillu peqqinnartumik unammiuaarnissaat, peqataasut ataasiakkaarlutik sapinngisartik tamaat pitsaanerpaamik angusaqarusussasut, unammisaqattaarnermilu angusaminnik pitsanngoriartitsiniarneq ilungersuutigissagaat,” borgmester Palle Jerimiassen oqaluttuarpoq.
Avannaa Arctic Games ukioq allortarlugu Ilulissani ingerlanneqartassaaq, ukiuni Arctic Winter Games-erfiunngitsuni.
”Kissaatigaarput peqataasut unammiuaaqataanissaminnut qilanaassasut, pinerillu tamaasa angusaminnik pitsanngoriartitsisarnissaminnik siunertaqassasut, saniatigullu nunani pineqartuni kulturit pillugit ilisimasaqarnerulerlutik”, borgmester Palle Jerimiassen oqarpoq.
Avannaa Arctic Games-imi unammissutit assigiinngitsut 13-iussapput, inuusuttunut inersimasunullu agguataarlugit.
Unammiuaarnerit isiginnaariarniaraanni iserneq akeqanngilaq, aamma YouTube aqqutigalugu KNR-ikkut toqqaannartumik isiginnaarneqarsinnaapput. Avannaa Arctic Games-ip Facebook-imi quppernerani pisussat malinnaaffigisinnaavatit.
Unammissutissat 13-iupput:
- One Foot High Kick
- Two Foot High Kick
- Airplane
- Head Pull
- Four man carry
- Arm pull
- Finger Pull
- Alaskan high kick
- Kneel Jump
- Eskimo Stick Pull
- Arsaaqqat
- Stick pull
- Snow Snake
